مجتث مثمن مخبون محذوف مسکن
مفاعِلن فَعِلاتن مفاعِلن فِعْلن
غَزل تو کہہ دِی غَزل کو سمجھ نہ پائے کبھی
سلیقہ اِس کو سمجھنے کا ہم کو آئے کبھی
اِسی بہانے ہماری بھی شام مہکے گی
ہمارے ساتھ پئیں آپ آ کے چائے کبھی
کہے گا جان تو رکھ دیں گے جان قَدموں مِیں
یقین اُس کو نہیں ہے تو آزمائے کبھی
غریب لوگ تَرستے ہیں ایک روٹی کو
امیرِ شہر کو جا کر کوئی بتائے کبھی
وہ بُھول جائے گا ہر ذائقہ یقین کریں!
ہمارے ہاتھ کا کھانا بھی آ کے کھائے کبھی
سبھی کے راستے ہَموار کر رہا ہے مگر
ہماری راہ سے پتھّر بھی تو ہٹائے کبھی
چُھپا رہا ہے وہ باتوں مِیں بات کاجؔل کی
اُسے کہا تھا جو ہَم نے زباں پہ لائے کبھی
سُمیرا سلیم کاجؔل
اسلام آباد
