بحرِ مجتث مثمن مخبون محذوف مسکن
مفاعِلن فَعِلاتن مفاعِلن فِعْلن
سَنبھال اَپنی مَحبّت قَرار لوٹا دے
جو چِھینے تُو نے وہ لَیل و نَہار لوٹا دے
مِری حیات کا دارومَدار تھا جِس پر
تَڑپ رہی ہُوں وہ میرا مَدار لوٹا دے
نَکیل ڈال کے کیوں بے مُہار کر ڈالا
مزید ظُلم نہ کر اَب مُہار لوٹا دے
جو خواب نوچ کے سُوئے فَلک اُچھالے تھے
وہ میری آنکھ کو پَروَردگار لوٹا دے
سِیاہ پوش ہے بَرگد کے سائے مِیں بیٹھی
تُو جا کے اُس کو اَدَب سے سِتار لوٹا دے
دُعا کی دیکھ تجارت کمال ہے سب سے!
تُجھے جو ایک دے اُس کو ہَزار لوٹا دے
تِرے وُجُود سے چھینا گیا ہے جو کاجؔل
کہوں کِسے تُجھے وُہ دِل فگار لوٹا دے
سمیرا سلیم کاجؔل
اسلام آباد
